Täämbädsest saava kooli ja latsiaia küssü tukõ paikligu keele ja umakultuuri oppamisõs

Põimukuu lõpun kirotõdi ala kavva oodõtulõ meetmele „Eesti keele piirkondlikku erikuju õpetavate õpetajate ja kultuuriõppe toetamise tingimused ja kord”. Tuu tugõ oṕmiskotussõt paikligu keele ja umakultuuri oppamisõl.

Võro Instituudi inemiisil om tuu üle umbõ hää miil ja mi kutsu kõiki Vana-Võromaa kuulõ ja latsiaidu taad võimalust tarvitama!

Vahtsõnõ meede om luudu uma keele ja kultuuri oppamisõ tugõmisõs haridusasotuisin ja umakultuuriga köüdetüide üritüisi kõrraldamisõs. Toetus kuts kuulõ ja latsiaidu üles julgõmbahe paiklikku kiilt tarvitama ja oppama, olkõ tuus määne taht paikkundlik kiil.

Meetme seen saa tukõ küssü katõ eri aśa jaos.
1) Ku oppaja, abioppaja vai latsiaiaoppaja oppas umma kiilt vai uman keelen ainõtunni, om tälle ette nätt lisatoetus. Tuu om täüstüüaoga tüütäjä puhul 20% põhikooli- ja gümnaasiumioppaja tüütaso alambmääräst kuun. Toetusõ saamisõs piät tunnist 60% kõnõlõma uman keelen, mi kandin sõs võro vai seto keelen.

2) Tukõ saa paigapäälidse kultuurioppusõ kõrraldamisõs välänpuul egäpääväst opitüüd. Tuusjaos om ette nätt 11 eurot aastagan egä haridusasotusõn opva latsõ kotsilõ, miä korrutõdas ummakõrda läbi paikligu koefitsendiga. Tuu om Antsla vallan 1,535, Kanepi vallan 1,704, Põlva vallan 1,353, Räpinä vallan 1,435, Rõugõ vallan 1,642, Valga vallan 1,171, Võro vallan 1,448 ja Võro liinan 1,0.

Toetusõ küsüjäs saa olla koolipidäjä, tuu tähendäs kas paiklik umavalitsus vai riigigümnaasium esi. Toetust saa küssü kats kõrda aastan. Timahavva saa toetust küssü 9.–28. süküskuu pääväl.

Teedüspäiv veebi kaudu om 15. süküskuu pääväl. MS Teams 15.00-16.30. Lähemb teedüs näide EKI veebilehe päält, kes meetme iist hää sais: https://eki.ee/asutus/toetused-ja-auhinnad/erikujude-toetusmeede/

Ku om küsümüisi, või noilõ Võro Instituudin vastada Hendriksoni Nele vai meetme koordinaatri Maripuu Kristiina Eesti Keele Instituudin.

Eesti riik om astnu suurõ sammu tuun tsihin, et naada väega praktilidsõ mooduga tähtsäs pidämä paiklikkõ kiili oppamist ja kultuuriperändi hoitmist. Ja kae, ETV ja Vikerraadio levüti jo tuud uudist kah!